Kongresi amerikan ka konfirmuar fitoren e presidentit të zgjedhur Joe Biden në zgjedhjet e 3 nëntorit, pas numërimit të votave të Kolegjit Zgjedhor dhe rrëzimit të të gjithë kundërshtimeve nga ana e disa kongresmenëve dhe senatorëve republikanë.
Presidenti i zgjedhur Biden, dhe zëvendëspresidentja e zgjedhur Harris arritën kuotën e 270 votave që duhen për të fituar presidencën pas numërimit të votave të elektorëve nga shteti i Vermontit.
Senati dhe dhoma e përfaqësuese hodhën poshtë me votë pretendimet e republikanëve për të mos njohur votat e Kolegjit Zgjedhor për shtetin e Xhorxhias dhe të Pensilvanisë, pas debateve në secilën prej dhomave. Republikanët kundërshtuan rezultatin edhe në Arizona, Nevada dhe Miçigan, por këto pretendime u hodhën poshtë pa u debatuar.
Me këtë rezultat, merr fund edhe një prej zgjedhjeve më të kontestuara në historinë moderne amerikane, ndërsa Biden pret tashmë 20 janarin për të bërë betimin dhe për të nisur presidencën e tij. Demokratët siguruan një tjetër fitore të mërkurën, duke marrë edhe 2 vende në Senat, çka i japin kontrollin e dy dhomave për herë të parë pas 10 vitesh.
Pasditen e djeshme SHBA u përball me një dhunë të pashembullt, pasi mbështetësit e Donald Trump u futën në ndërtesën e Kongresit. Gjatë përplasjeve humbën jetën 4 persona, ndërsa janë arrestuar 52 të tjerë./ Opinion.al
