Presidenti Ilir Meta e ndezi më shumë konfliktin e nisur pak ditë më parë me mazhorancën për Gjykatën Kushtetuese. Ai dekretoi Marsida Xhaferllarin, anëtare të kësaj gjykate, si emërimin e dytë që i takon Presidentit, nga lista me katër propozime që i bëri Këshilli i Emërimeve në Drejtësi. Por në të njëjtin post, të hënën parlamenti quajti të emëruar Arta Vorpsin. Vorpsi u rendit e para në listën që Këshilli i Emërimeve në Drejtësi i dërgoi presidentit dhe parlamentit.
Presidenti nuk zgjodhi, pasi argumentoi se kishte zgjedhur më parë Besnik Muçin si anëtar dhe për këtë arsye radha i takonte parlamentit të vendoste për anëtarin që i takon legjislativit.
Afati kushtetues 30 ditor nga dërgimi i listës nga KED i skadoi kreut të shtetit më 8 Nëntor dhe Arta Vorpsi u quajt e emëruar automatikisht. Emri i saj u publikua e para në Fletoren Zyrtare.
Presidenti nuk e njeh këtë procedure për shkak se thotë se zgjedhjet bëhen me radhë mes Presidencës, Parlamentit dhe Gjykatës së Lartë. Por në dekretimin e Xhaferllarit, ai e pranon zgjedhjen e dy kandidatëve njëherazi nga parlamenti.
“Duhet të kemi të qartë ju dhe çdo qytetar se nuk ka një afat të caktuar në Kushtetutë për Presidentin, ka afat për parlamentin, për arsye se është një institucion kolegjial që përbëhet edhe nga forca të ndryshme politike, por jo për Presidentin. E dyta, që duhet të jetë e qartë për çdo shqiptar, Kushtetuta është mbi çdo gjë, aq më tepër kur bëhet fjalë për krijimin e gjykatës Kushtetuese. Kushtetuta është zero, letër pa Gjykatën Kushtetuese. Momenti i krijimit të Gjykatës është historik sepse për herë të parë krijohet gjykata sipas reformës që u bë në kushtetutë për reformën në drejtësi dhe është e rëndësishme që të respektohet kushtetuta aq më tepër për gjykatën, pasi është garancia për mbrojtjen e popullit shqiptar. Çdo akt në këtë proces është historik sepse do të mbetet si një referencë në të ardhmen, çdo veprim i presidentit aktual është një veprim që mbetet si precedent, apo cdo veprim i kuvendi është precedent. KED është një institucion që merret vetëm me menaxhimin administrativ dhe asgjë tjetër. Pra Kushtetuta tregon si krijohet gjykata, Presidenti ka të drejtën për vakancën e parë, pastaj është parlamenti dhe në këtë mënyrë përsëritet e njëjta renditje dhe në këtë plan është detyra e KED-së që të rregullojë listat e vakancave dhe të afateve, që të respektohet Kushtetuta për mënyrën e ndërtimit të gjykatës dhe të mos kemi përplasje. Kryetari i KED të bëjë lojëra me karakter administrativ në mënyrë mafioze, që të vendosë presidentin në këtë pozitë, kreun e shtetit, që ose të shkelë Kushtetutën” tha Presidenti në një konferencë për mediat./ Opinion.al
