Presidenti i Shteteve të Bashkuara të Amerikës, Joe Biden zhvilloi një bisedë telefonike me kryeministrin izraelit Benjamin Netanyahu për situatën që është krijuar në ditët e fundit, lidhur me konfliktin midis Izraelit dhe Hamasit.
Sipas deklaratës së Shtëpisë së Bardhë, Biden shprehu mbështetjen për vendosjen e një armëpushimi dhe u shpreh se SHBA po bashkëpunojnë ngushtësisht me Egjiptin për arritjen e këtij qëllimi.
“Presidenti shprehu mbështetjen për një armëpushim dhe diskutoi mbi angazhimin e SHBA me Egjiptin dhe partnerë të tjerë drejt këtij qëllimi,” tha Shtëpia e Bardhë.
Izraeli vazhdoi të godiste Gazën me sulme ajrore të hënën dhe militantët palestinezë hodhën raketa të tjera në qytetet izraelite.
Në telefonatë, presidenti i SHBA, gjithashtu ka mbështetur të drejtën e Izraelit për t’u mbrojtur nga raketat e Hamasit, por shtoi se duhet bërë çdo përpjekje për të mbrojtur jetën e civilëve të pafajshëm.
“Presidenti përsëriti mbështetjen e tij të vendosur për të drejtën e Izraelit për t’u mbrojtur nga sulmet e raketave” , thuhet në deklaratë./Opinion.al
