Ministria polake e Mbrojtjes konfirmoi se dy helikopterë bjellorusë shkelën hapësirën ajrore të saj gjatë stërvitjeve pranë kufirit.
Fotot që përshkruanin helikopterët që fluturonin mbi fshatin polak të Bialowieza u shfaqën në mediat sociale gjatë ditës së djeshme.
Sipas deklaratës së ministrisë, pala bjelloruse kishte njoftuar më parë Varshavën për stërvitjen e planifikuar. Është thirrur një mbledhje e Komisionit për Çështjet e Sigurisë Kombëtare dhe Mbrojtjes për të diskutuar incidentin.
Pas takimit, ministri i Mbrojtjes i Polonisë, Mariusz Blaszczak, urdhëroi rritjen e numrit të trupave në kufirin polako-bjellorusi dhe vendosjen e pajisjeve shtesë, përfshirë helikopterët luftarakë.
Polonia gjithashtu informoi NATO-n për shkeljen e hapësirës ajrore dhe vendosi të thërrasë të ngarkuarin me punë të Bjellorusisë në Ministrinë e Jashtme për një shpjegim.
“Rusia dhe Bjellorusia kanë intensifikuar së fundmi aktivitetet hibride kundër Polonisë,” shkroi ministria e mbrojtjes. “Për shkak të provokimeve të mëtejshme të mundshme, ne bëjmë thirrje për shpërndarje të përgjegjshme të informacionit që mund të përdorin regjimet ruse dhe bjelloruse”.
Ministria e Mbrojtjes e Bjellorusisë e quajti deklaratën e Varshavës “të sforcuar”, duke pretenduar se ajo ishte bërë “për të justifikuar grumbullimin e forcave dhe mjeteve pranë kufirit bjellorusi”.
