Drejtuesi i Prokurorisë së Pogradecit, Sotir Kllapi është konfirmuar në detyrë nga Komisioni i Pavarur i Kualifikimit.
Në seancën dëgjimore të mërkurën, Kllapi kaloi pa probleme kontrollin mbi pasurinë dhe pastërtinë e figurës por trupi gjykues kishte ngritur pikëpyetje mbi dy çështje të hetuara prej tij. Ato kishin të bënin me dyshimin për favorizimin e të pandehurit për një rast të armëmbajtjes pa leje dhe një tjetër për trafikim lëndësh narkotike.
Për të dyja rastet prokurori Kllapi sqaroi komisionin se vendimet e tij ishin të bazuara në provat e referuara ndaj tij nga organet e policisë. Procesi i vettingut për Kllapin u krye nga trupa e kryesuar nga Lulzim Hamitaj, me relator Roland Ilian dhe anëtare Firdes Shulin.
Prokurori Sotir Kllapi ka marrë raport pozitiv nga ILDKPKI mbi interesat e tij private si dhe raport “përshtatshmërie” nga Drejtoria e Sigurimit të Informacionit të Klasidikuar, DSIK./ Opinion.al
