Konferenca për Klimën në Ballkanin Perëndimor, e cila mbahet sot në Tiranë, është ndërprerë për rreth dy orë, për shkak të një incidenti që lidhet me praninë e delegacionit kosovar. Gjithashtu, mësohet se ministri serb dhe disa zyrtarë të lartë serbë kanë kërcënuar me largim nga aktiviteti.
Në një prononcim për mediat, Ministri i Mjedisit Blendi Klosi tha se aktiviteti është organizuar nga Organizata e Kombeve të Bashkuara dhe incidenti lidhej me praninë e Kosovës me të drejta të plota në këtë tryezë. Klosi tha se problemi lidhej thjesht me protokollin, por ishte iniciativë e Ministrisë së Mjedisit të Shqipërisë që edhe Kosova të ishte pjesë e tryezës.
“Është një aktivitet i organizuar nga Kombet e Bashkuara, ka personalitete të shquara të gjithë botës dhe institucioneve ndërkombëtare. Kur vjen puna te fondet, Kosova është pjesë e diskutimit. Për sa i përket rregullave të Kombeve të Bashkuara janë jashtë kompetencës sonë. Ne e bëmë ftesën sepse ishte e palogjikshme që të bënim konferencë për rajonin, pa praninë e Kosovës. Kishim një dakortësi me OKB-në dhe Serbinë, për zhvillimin e aktivitetit. Ajo që nuk u pranua nga organizatorët ishte prezenca me të drejta të plota të Kosovës, më detyroi dhe mua që të bënim 2 orë diskutime dhe negociata me ta. E rëndësishmja është që konferenca të zhvillohet. Tashmë Kosova do të jetë e pranishme me statusin e të ftuarit special”, ka sqaruar Klosi.
Nga ana e tij, edhe homologu kosovar Fatmir Matoshi ka sqaruar se sipas rregullave të OKB-së, Kosova duhet të paraqitet në aktivitetet e saj me përfaqësues të UNMIK-ut, gjë që është e papranueshme.
“Ajo që ka ndodhur sot ka të bëjë me rregulla strikte të Kombeve të Bashkuara që Kosova të jetë e përfaqësuar nën siglën e UMNIK-ut ose të personave të Kosovës të shoqëruar nga zyrtarë të UMNIK-ut, gjë që për zyrtarët e Kosovës është e papranueshme dhe nuk do të ndodhë. Ne kemi shfrytëzuar mundësinë që të takojmë gjithë donatorët dhe të kërkojmë mbështetjen e tyre. Tashmë do të zhvillohet një konferencë vetëm në nivel teknik”, ka thënë ministri kosovar Matoshi./Opinion.al
