Ministrja e Financave dhe e Ekonomisë Anila Denaj ka qenë e pranishme sot në Komisionin e Ekonomisë, ku është diskutuar projektligji i ri për koncesionet dhe Partneritetet Publik-Privat.
Në komision mungonin deputetët e Partisë Demokratike, ndërsa ishte i pranishëm Edmond Haxhinasto i LSI-së. Denaj tha në projektligjin e ri paragjikohet që të mos pranohen më propozime të pakërkuara, përveç aeroporteve, porteve dhe energjetikës.
“Synimi është të përmirësojmë kuadrin ligjor për dhënien e koncesioneve dhe PPP. Duhet të theksojmë se në hartimin e këtij projekti janë marrë në konsideratë edhe opinionet e ndërkombëtarëve si FMN apo BB. Të lejohen propozimet e pa kërkuara vetëm për realizmin e porteve, aeroporteve dhe të energjisë. Për ndërtimin, operimin e rrugëve nacionale me rëndësi të veçantë nuk do të ketë propozime të pa kërkuara. Përmes këtij projekt ligji hiqet bonusi për propozimet e pa kërkuara dhe do kompensohen me vlerë monetare që nuk do jetë me e lartë se 1% e investimit”, është shprehur ministrja.
