Kryeministri Edi Rama ka nisur komunikimin javor në facebook me ndjekësit e tij.
Ai e nis fjalën me premtimin se do të ndryshojë metodën e punësimit në administratë që deri tani është bërë përmes një tesere partie.
“Na ndihmoni të bëjmë shtetin siç duhet dhe jo shtet tepsi siç ka qenë për 27 vite”, tha Rama.
Ndërsa shton: “Mos i besoni përrallat me komplot ndaj LSI apo një marrëveshje paraprake për bashkëqeverisje me PD. Nuk është asnjëra nga këto. Ajo që kërkojmë më 25 qershor është të qeverisim vetë. Që të mos kemi më administratë me përqindje sipas ndarjes së partive në koalicion”.
Rama tha se qytetarët janë të vetëdijshëm se në zyrat e shtetit sidomos jashtë Tiranë janë shërbëtorët e partive.
Duke kërkuar votën qytetarëve Rama thotë se asnjë nga kryetarët e partive në garë nuk bëhet dot kryeministër, ndaj “mos i çoni votat dëm”.
“Kë do bëni kryeministër? Lulin, Petritin, Shpëtimin apo Benin? Asnjë nga ata nuk bëhen dot. Duan vota për të ushqyer partitë…”, shprehet ai.
