Njëzet e pesë persona janë arrestuar në të gjithë Gjermaninë, pasi janë të dyshuar për komplot për të rrëzuar qeverinë.
Sipas BBC, raportet gjermane thonë se grupi i figurave të ekstremit të djathtë dhe ish-ushtarakë planifikuan të sulmonin ndërtesën e parlamentit, Reichstag, dhe të merrnin pushtetin.
Një gjerman i referuar si një princ i quajtur Heinrich XIII, 71, dyshohet se ka qenë personazh qendror në planet e tyre.
Sipas prokurorëve federalë, ai është një nga dy drejtuesit e dyshuar në mesin e të arrestuarve në 11 lande.
Komplotuesit thuhet se përfshijnë anëtarë të lëvizjes ekstremiste Reichsbürger [Qytetarët e Rajhut], e cila ka qenë prej kohësh nën vëzhgimin e policisë gjermane për sulme të dhunshme dhe teori konspirative raciste. Ata gjithashtu refuzojnë të njohin shtetin modern gjerman.
Rreth 50 burra dhe gra dyshohet se kanë qenë pjesë e grupit që thuhet se kanë komplotuar për të përmbysur republikën dhe për ta zëvendësuar atë me një shtet të ri të modeluar sipas Gjermanisë së 1871 – një perandori e quajtur Rajhu i Dytë.
“Ne nuk kemi ende një emër për këtë grup,” tha një zëdhënëse e zyrës së prokurorit federal.
Bastisjet u zhvilluan në pjesën më të madhe të Gjermanisë dhe dy persona u arrestuan në Austri dhe Itali, njoftoi agjencia gjermane e lajmeve DPA. Të arrestuarit do të merren në pyetje më vonë gjatë ditës.
Ministri i Drejtësisë Marco Buschmann shkroi në Twitter se një operacion i madh anti-terror po ndodhte dhe se ishte planifikuar një sulm i dyshuar i armatosur ndaj organeve kushtetuese.
Prokurori federal tha se grupi kishte komplotuar një grusht shteti të dhunshëm që nga nëntori 2021.
Ish anëtarët e ushtrisë ishin gjithashtu një pjesë e rëndësishme e komplotit të grushtit të shtetit, thanë raportet. Ata përfshinin ish-ushtarë elitë nga njësitë speciale.
