Partizani i ka parë hairin paraqitjes verore në Kupat e Europës. 910 mijë euro i siguruan të kuqtë nga prezantimi në Ligën e Europës dhe në dy turet paraeliminatore në Champions.
Por, përveç kësaj, mbrëmë të kuqtë e kanë mbyllur me një tjetër bilanc pozitiv. Nga reklamat e vendosura nga kompanitë ruse në panelin publicitar të stadiumit “Elbasan Arena” mësohet se kryeqytetasit kanë përfituar rreth 30 mijë euro.
Falë menaxhimit të mirë, drejtuesit e Partizanit kanë arritur që këtë verë të mbushin arkat e klubit, duke krijuar një buxhet të shëndoshë për sezonin e ri, raporton panoramaSport.
Partizani mund të përfitonte nga reklamat në stadium edhe në ndeshjen e parë të Champions-it me Salzburgun të zhvilluar në “Elbasan Arena”, por kjo gjë ka dështuar për faj të një defekti që ka pasur paneli i reklamave në këtë takim.
Moti i keq para sfidës kishte nxjerrë jashtë funksionit panelin e reklamave elektronike të stadiumit të Elbasanit, kështu që Partizani nuk arriti të përfitonte nga ky rast, pasi ka pasur interesim nga kompani austriake që të reklamonin produktet e tyre në këtë takim.
Gjithsesi, aventura europiane e Partizanit në Ligën e Europës është mbyllur mbrëmë me një barazim 0-0, por edhe me një përfitim prej 30 mijë eurosh nga reklamimi i kompanive ruse në stadium.
