Dje u mbajt në Romë, Kongresi i radhës i UEFA-s, ku u zgjodhën edhe anëtarët e rinj të Komitetit Ekzekutiv, të qeverisë më të lartë të futbollit në Evropë, midis të cilëve fitues u përzgjodh edhe Armando Duka, President i Federatës Shqiptare të Futbollit.
Por duket se puna e qeverisë së re të futbollit evropian nuk ka nisur mbarë.
Në konferencën e parë për shtyp, Presidenti i rizgjedhur, Aleksandër Ceferin, u përball nga gazetarët me akuzat për mashtrim që kanë përfshirë dy prej anëtarëve të të zgjedhur dje në Komitetin Ekzekutiv.
Konkretisht për Nasel Al Khelaifi, president i PSG dhe Andriu Pavelko, President i Federatës Ukrainase të Futbollit, të cilët akuzohet për mashtrime financiare dhe janë në hetim nga organet ligjore.
Al Khelaifi po hetohet në Zvicër, për shkelje financiare që kanë lidhje me FIFA-n, ndërsa akuzohet edhe për lidhje të afërta me ish-kreun e UEFA-s, Mishel Platini, i larguar edhe ky për korrupsion.
Ndërsa për rastin e anëtarit Pavelko, ai është në hetim në vendin e tij për mashtrim financiar.
Disa organizata në Ukrainë madje i kanë dërguar shkresa zyrtare presidentit Ceferin që të mos lejohej kandidimi i tij
“Letrat që kanë mbërritur nuk kishin asnjë provë konkrete. Duhet të mbajmë në mendje prezumimin e pafajësisë së personave në fjalë dhe nuk kishte pse të bllokonim kandidimin dhe zgjedhjen e tyre”, tha Ceferin.
Ndërsa për rastin Al Khelaifi, i cili hetohet se përdori ryshfete që të siguronte të drejtat e transmetimit të ndeshjeve të Botërorit për rrjetin e tij televiziv Bein Sports, Ceferin u shpreh se: “E kuptoj që mund të quhet konflikt interesi, por nuk mendoj se ky është shqetësimi i duhur për momentin”. Dl
