Komisioni për reformën në drejtësi mund të mblidhet të hënën për të nisur diskutimin për ligjin e Vettingut. Eksperti i PD, Gazmend Bardhi tha në studion e lajmeve të Ora News se ligji delikat që do të aplikohet në Shqipëri për herë të parë duhe të diskutohet në një mbledhje me dyer të hapura në mënyrë që edhe shqiptarët të njihen me atë që parashikon.
“Është menduar apo ka një ide për tu mbledhur të hënën. Megjithatë është një çështje që dakordësohet mes kryetarit dhe nënkryetarit të komisionit. Bylykbashi ka shprehur dakordësinë dhe gatishmërinë e anëtarëve të opozitës në këtë komision për të marrë pjesë dhe për të filluar menjëherë nga puna, por duhet edhe vullneti i palës tjetër, pra i PS për të bërë mbledhjen e komisionit dhe për të bërë shqyrtimin e amendamenteve e ligjit për vlerësimin e gjyqtarëve.
Në këtë moment deputetët e opozitës janë gati për t’u ulur dhe për të diskutuar nen për nen dhe në thellësi pr/ligjin e ri për vlerësimin e gjyqtarëve dhe prokurorëve. Duhet të vemë theksin që është një ligj specifik. Shqipëria është vendi i parë që aplikon një ligj të tillë, pra nuk ka modele në vendet e tjera, prandaj është një ligj kompleks dhe që kërkon përgjegjshmëri gjatë shqyrtimit në komisionin e posaçëm”, theksoi Bardhi.
