Aktualitet

Komisioni i Rithemelimit: Dyer të blinduara në PD, akt turpi e paniku i Bashës


Bëhu pjesë e Grupit Zyrtar të Opinion.al
>> KËTU <<
               Publikuar në : 08:42 - 04/01/22 |
Opi Nion

Në selinë e Partisë Demokratike u bënë disa ndryshime ditën e djeshme. Dyert e jashtme u veshën me posterat e logos së PD.

Lidhur me këto ndryshime ka reaguar Komisioni i Rithemelimit të PD, i cili e akuzon Bashën se ka vendosur dyer të blinduara në ambientet e brendshme dhe ka fortifikuar dritaret.

Përmes një njoftimi për mediat, Komisioni i Rithemelimit thotë se “Lulzim Brava e nisi Vitin e Ri me avazin e vjetër të izolimit”. Sipas Komisionit të Rithemelimit, ndryshimet në PD janë akte turpi dhe paniku që e kthejnë selinë e PD në bunkerin e Bashës.

“Deputeti Lulzim Brava e nisi Vitin e Ri me avazin e vjetër të izolimit. Pasi izoloi veten nga 4446 delegatë dhe 43.385 anëtarë që firmosën shkarkimin e tij ai ka vendosur në prag të protestës paqësore të demokratëve ta kthejë shtëpinë e tyre në bunkerin e vetmisë dhe pazareve te tij. Kështu, në një akt turpi dhe paniku të denjë vetëm për një apartcik të marrë peng, ai ndërron brava dhe po vendos dyer të blinduara për të shndërruar shtëpinë e demokratëve, selinë e Partisë Demokratike, në bunkerin e tij privat.

Me këtë rast i kujtojmë Lulzim Bravës që mendon se me dyer dhe brava do të mposhtë shumicën dhe pluralizmin në Shqipëri se ata që shembën regjimin më gjakatar në ’90 nuk do të lejojnë kurrë asnjë derë brave, hekur apo shul të mbajë peng vullnetin e tyre të shprehur përmes votës së lirë. Partia Demokratike ka lindur si shtëpi e lirisë dhe e tillë do të vijojë të mbetet, kurse Lulzim Pengu së bashku me pengmarrësin e tij do kenë fatin e atyre që bunkerizuan Shqipërinë”, thuhet në njoftimin e Komisionit të Rithemelimit.

Kujtojmë se Komisioni i Rithemelimit i ngritur nga Kuvendi i 11 Dhjetorit i thirrur nga ish-Kryeministri Sali Berisha i ka lënë afat deri më 5 Janar Lulzim Bashës që të dalë nga selia blu pas shkarkimit të këtij të fundit më 18 Dhjetor me referendum nga anëtarësia. Ndërsa Basha ka thënë në daljet e tij të fundit se asgjë nuk do të ndodhë më 5 janar./Opinion.al

Pas