Komisioni i Ligjeve ka miratuar me shumicë votash një pjesë të ndryshimeve të parashikuara në marrëveshjen e 5 qershorit për Kodin Zgjedhor. Do të jetë SPAK që do të hetojë krimin zgjedhor me ndryshimet e reja ligjore për Prokurorinë.
Në amendimin e ligjit, SPAK-ut i jepet e drejta të hetojë shitblerjen e votës kurse prokuroritë në rrethe do të ngrenë grupe të posaçme. Po ashtu, SPAK do të raportojë në KQZ krimet zgjedhore, por pa cenuar sekretin hetimor.
Komunikim i SPAK-ut dhe Prokurorisë së Përgjithshme me KQZ-në do të jetë si me gjithë institucionet e tjera, gjithmonë duke u bazuar ne kërkesën e vetë KQZ-së, por jo si detyrim i prokurorisë.
Kundër këtij ligji votoi vetëm deputeti Ardiatik Alimadhi, i cili tha se edhe në Kuvend ka votuar kundër marrëveshjes së 5 qershorit mes partive politike. “Këto subjekte politike e kanë shpikur fenomenin e vjedhjes së votës”, u shpreh Alimadhi.
Komisioni i Ligjeve ka miratuar edhe amnistinë penale të atyre që bashkëpunojnë për zbulimin e krimeve zgjedhore. Paketa zgjedhore pritet të miratohet me 17 dhjetor në Kuvend./Opinion.al
