Komisioni Hetimor i ngritur për Presidentin Meta ka vendosur ti drejtohet sërish Komisionit të Venecias për ligjshmërinë e veprimeve të Presidentit në kuadër të zgjedhjes së anëtarëve të Gjykatës Kushtetuese.
Konkretisht, Komisioni ka vendosur të pyesë Venecian lidhur me vendimi e Metës për të mos organizuar ceremoninë e betimit të Arta Vorpsit në postin e anëtares së Gjykatës Kushtetuese.
“A mundet presidenti të mos organizojë betimin e anëtarëve të Gjykatës Kushtetuese kur ata quhen të emëruar?
A është në përputhje me standardet më të mira mekanizmi zhbllokues?
A është betimi me shkrim një formë për zhbllokimin e situatës?”, janë tre nga pyetjet që Komisioni do t’i drejtojë Komisionit të Venecias.
Gjatë mbledhjes së sotme u vendos gjithashtu zgjerimi i objektit të hetimit ndaj Presidentit si dhe thirrja në cilësinë e dëshmitarit të kreut të KED, Ardian Dvorani ndaj të cilit Meta ka ngritur një padi penale për shpërdorim detyre.
Deputetët e opozitës u shprehën votuan kundër shtesës së objektit të hetimit ndaj Presidentit. Deputeti Alban Zeneli e quajti këtë një lojë politike mes shumicës dhe Presidentit, por ranë dakord që komisioni t’i drejtohej përsëri Venecias.
Sesioni i radhës së Komisionit të Venecias do të mbahet më 20 mars, çka me siguri do të bëjë që Komisioni Hetimor të kërkojë një tjetër shtyrje të mandatit të tij, pasi i përfundon më 8 mars. /Opinion.al
