Pas vendimit të Komisionit të Posaçëm Hetimor Parlamentar për Presidentin Meta për të zgjeruar objektin e hetimit ndaj tij ka reaguar zëdhënësi i Presidencës, Tedi Blushi.
Thirrjen si dëshmitar të kreut të KED, Ardian Dvorani ai e ka cilësuar si marrje në mbrojtje nga përgjegjësitë penale dhe procesin në tërësi si një presion politik ndaj organit të akuzës.
“Veprimet e fundit të komisionit parlamentar janë qartazi marrje në mbrojtje nga përgjegjësitë penale të z.Dvorani, i cili është kallëzuar në Prokurori për veprimtarinë e tij të mirëdokumentuar kriminale.
Ky “solidaritet” vërteton se krimet e z.Dvorani janë kryer në bashkëpunim.
Dihet botërisht respekti që ka për Komisionin e Venecias ky grup i strukturuar dhe i specializuar për dhunimin e Kushtetutës.
Ndaj veprimet e tyre fundit në shkelje të ligjit dhe Kushtetutës nuk janë asgjë tjetër veçse një presion i qartë politik ndaj organit të akuzës.
Sa i përket shtyrjes së afatit të komisionit parlamentar, ne e kemi dhënë mendimin tonë: Punimet të shtyhen deri në 24 korrik 2022. Në këtë mënyrë deputetët e komisionit do kenë mundësi të përfitojnë akoma më shumë shpërblime financiare për çdo mbledhje.”, shkruan Tedi Blushi. /Opinion.al
