Komisionerja Europiane për Çështjet e Brendshme, znj. Ylva Johansson, gjatë një vizite në Tiranë ka takuar presidentin e vendit Meta si dhe kreun e Partisë Demokratike Lulzim Basha.
Përmes një publikimi në rrjetin social Facebook, Meta bëri të ditur se bashkëbisedimi me komisioneren është fokusuar në hapat e Shqipërisë në procesin e integrimit, ndërsa shprehet se ka theksuar rëndësinë e zgjedhjeve të lira dhe të ndershme.
“Kënaqësi të takohesha sot me Komisioneren Europiane për Çështjet e Brendshme, znj. Ylva Johansson. Një bashkëbisedim i hapur dhe i frytshëm mbi sfidat urgjente të rrugës europiane të Shqipërisë. E falenderova për mbështetjen e gjithanshme, që BE i jep vendit tonë, përfshirë parandalimin dhe menaxhimin e emigracionit të paligjshëm përmes bashkëpunimit me FRONTEX. Theksova rëndësinë, që do të ketë zhvillimi i zgjedhjeve të lira dhe të ndershme për rrugën europiane të Shqipërisë. Pas zgjedhjeve të 25 prillit 2021, krimi i organizuar do të marrë goditje të prerë dhe Shqipëria do të kthehet në shinat e shtetit ligjor dhe të respektimit të plotë të të drejtave të njeriut”, shkruan Meta.
Ndërkohë, në një dalje për mediat pas këtij takimi, kreu i PD Lulzim Basha u shpreh ndër të tjera se e ka njohur komisioneren me planin antimafia të forcës që ai drejton.
“Korrupsioni qeveritar i ka vjedhur shqiptarëve 8 vite kohë, miliarda euro dhe u ka mbyllur dyert me Evropën”, theksoi Basha./Opinion.al
