Kryeministri Edi Rama ka dhënë një intervistë për BBC, ku ka akuzuar Mbretërinë e Bashkuar se po sulmon shqiptarët për të justifikuar politikat e saj të dështuara të emigracionit dhe të ruajtjes së kufijve.
Po ashtu kreu i qeverisë ka komentuar edhe deklaratën e Sekretares së Brendshme, Suella Braverman, duke thënë se deklaratat e saj nuk bënin gjë tjetër veçse nxisin ksenofobinë.
“Kjo lloj gjuhe nuk është politikë, nuk është program, nuk është vizion”, është shprehur Rama.
Braverman tha disa ditë më parë se Anglia jugore po përballej me një pushtim emigrantësh dhe mes të tjerash akuzoi shqiptarët se po abuzojnë me ligjet moderne të skllavërisë.
Gjatë intervistës për BBC Newsnight, Rama tha se komentet e Braverman për “pushtim” ishin të “pavend” dhe se ai e kishte “të pamundur që të mos reagonte”.
“Nuk është për një person. Ka të bëjë me klimën që është krijuar dhe që kërkohen koka turku apo të fajësohen të tjerët. Nuk ka të bëjë me shqiptarët, të huajt, apo gangsterët, por është për politikat e dështuara për kufijtë dhe kriminalitetin. Kjo lloj gjuhe nuk është politikë, nuk është program, nuk është vizion. Është vetëm nxitje e ksenofobisë dhe shënjestrim, duke veçuar një komunitet. Unë admiroj çdo gjë që përfaqëson Britaninë. Por me të vërtetë jam i neveritur rreth kësaj politikë që në fund është e destinuar të dështojë”, është shprehur Rama.
Kujtojmë që më herët Rama përmes një postimi në Twitter tha se Britania po diskriminonte shqiptarët për të shpërqendruar vëmendjen nga “dështimi i politikave të saj”.
I pyetur për këto komente të kryeministrit shqiptar, Ministri i Emigracionit i Britanisë së Madhe, Robert Jenrick, tha se donte një “marrëdhënie produktive” me zotin Rama.
“Por është gjithashtu e vërtetë se Shqipëria është një vend i sigurt, dhe shumica dërrmuese e njerëzve që vijnë nga Shqipëria janë meshkujnë moshë të re”, tha ai për ITV.
“Është një shembull i mirë i emigrantëve ekonomikë, të atij lloji që ne si vend duhet të përpiqemi të bëjmë më të mirën për të penguar”, shtoi ai.
