Axhendë e ngjeshur ka qenë kjo e ditës së sotme për kontigjentin e Kombëtares Kuqezi. Sipas njoftimeve zyrtare nga përfaqësuesit e FSHF-së, transmetohet se pjesë e programit të ditës së sotme, veç regjimit dhe përgatitjeve, ishte edhe realizimi i fotove zyrtare të skuadrës kombëtare. Sipas një plani të hartuar nga zyra e shtypit, në bashkëpunim me stafin drejtues të ekipit, sot në dy fraksione kohe, pas mbledhjes së mesditës dhe pas konsumimit të drekës, të gjithë futbollistët e skuadrës kombëtare, drejtuesit dhe stafi i saj, “pozuan” përpara fotografit zyrtar të ekipit.
Fotot portret, në disa versione për të gjithë protagonistët kuqezi, janë realizuar, për tu publikuar së bashku me të dhënat e çdo futbollisti, në ueb-in zyrtar të Federatës Shqiptare të Futbollit. Në këtë projekt, janë parashikuar edhe fotot në grup të skuadrës, me uniformën me të cilën do të paraqiten në finalet e Kampionatit Europian “ Francë 2016”. Gjithashtu janë parashikuar edhe foto, të skuadrës me kustomet civile me të cilat do të paraqiten në Francë. Të gjitha këto janë parashikuar të realizohen më datë 30 maj.
