Prej datës 14 qershor Kombëtarja shqiptare është pa trajner. Largimi i menjëhershëm i Xhani De Biazit dhe zgjidhja e kontratës me Federatën Shqiptare të Futbollit e futi Shqipërinë në një situatë të pakëndshme.
Është mesi i eliminatoreve të Botërorit dhe pavarësisht faktit që kualifikimi është mision i pamundur, një situatë e ngjashme i kishte ndodhur rrallë Shqipërisë. Federata u gjend disi e papërgatitur dhe pa një plan B, edhe pse në ajër kuptohej që nuk do të vazhdonte për shumë kohë bashkëjetesa me italianin.
8 NGA 211
Nga një vëzhgim i bërë nga “Panorama Sport”, rezulton se nga 221 ekipe kombëtare të pranuara nga FIFA, janë vetëm tetë prej tyre që për momentin nuk kanë një timonier për të drejtuar punën. Megjithatë, nuk është fakt ngushëllues për FSHF-në dhe për Shqipërinë që gjendet në këtë situatë sepse këto shtete dhe ekipe përfaqësuese që nuk kanë trajner janë të një niveli të dobët dhe ndoshta të padëgjuara në elitën e futbollit ndërkombëtar.
Bëhet fjalë për Korenë e Jugut (e cila është e vetmja kombëtare me një nivel të kënaqshëm, ndryshe nga emrat e tjerë), trajneri i së cilës është larguar vetëm 3 ditë pas De Biazit, por edhe për skuadra të tjera si Kuvajti, Guatemala, Guinea Ekuatoriale, Timori Lindor dhe Pakistani. Bashkë me Shqipërinë, shkon në 8 numri i skuadrave pa trajner.
MUAJ VENDIMTAR
Shqipëria është me sytë nga zyrtarizimi i trajnerit të ardhshëm, i cili do ta udhëheqë ekipin në katër ndeshjet e mbetura të eliminatoreve të Botërorit, por edhe për ato të Europianit të ardhshëm. FSHF-ja ka bërë me dije se emri i ri do të mësohet brenda muajit korrik dhe po punohet në disa pista për të arritur një zgjidhje optimale.
Me shumë gjasa ai do të jetë italian dhe lista e dëshirave dhe e mundësive është shumë e gjatë. Inzagi ishte njëri prej tyre, por nuk u bë asgjë. Emri i tij duket se mbeti thjesht një tentativë, ndërsa ne duhet të shpresojmë që Pakistani dhe Timori Lindor të mos e gjejnë trajnerin përpara Shqipërisë…
