Ndaj sulmit të Shteteve të Bashkuara mbi objektet bërthamore të Iranit, do të ketë një “përgjigje të fortë”. Kështu ka deklaruar komandanti i përgjithshëm i ushtrisë iraniane
Përmes një deklarate publike të shpërndarë për disa media iraniane, gjenerali madhor Amir Hatami u shpreh:
“Gjatë gjithë historisë sonë, ne jemi përballur me Amerikën shumë herë. Çdo herë që kanë tentuar të na afrohen, kanë marrë një përgjigje të fortë”
Ndërkohë ai shtoi më tej: “Ne do të luftojmë; do të luftojmë për lumturi. Kemi dhënë shumë dëshmorë, por do të luftojmë me forcë dhe guxim. Duhet të jeni të sigurt për fuqinë tonë,” ka shtuar ai.
Gjenerali Amir Hatami, një nga figurat më të larta ushtarake në Iran, është emëruar në këtë post më pak se një javë më parë, pasi Irani bëri riformatime në drejtimin ushtarak për të zëvendësuar pozicionet e mbetura bosh pas vrasjes së disa figurave të larta nga sulmet e fundit të Izraelit.
