Kolegji zgjedhor ka rrëzuar padinë e PD dhe LSI për mos regjistrimin e komisionerëve në KZAZ. Ky vendim do të thotë se PD dhe LSI nuk do të mund të çojnë dot komisionerë në zgjedhjet vendore të 30 qershorit.
Kolegji Zgjedhor vendosi ti bashkojë 2 paditë e Partisë Demokratike dhe asaj të LSI-së në një te vetme. Dy partitë opozitare paditën KQZ për mos regjistrimin e komisionarëve.
Në seancë, PD u përfaqësua nga Ivi Kaso, ndërsa LSI nga Muharrem Caka, të cilët thanë gjatë seancës se u është mohuar një e drejtë ligjore.
“Kodi parashikon qartë: në nenin 29 të Kodit Zgjedhor ku thuhet se në rastin e zgjedhjeve vendore, renditja përcaktohet mbi bazën e numrit të votave të fituara në shkallë vendi për këshillat vendor në zgjedhjet pararendëse nga partitë parlamentare”, tha Kaso.
Ndërsa Caka shtoi: “KQZ ka veshur syzet politike duke thënë se në s’jemi parti parlamentare. Se i kujt është Kujtim Gjuzi dhe Ylli Shehu, na thoni. Vendimi i KQZ është i paligjshëm dhe i pabazuar në kodin zgjedhor”.
Përfaqësuesi i KQZ ritheksoi dhe njëherë argumentin e komisionit se këto dy subjekte nuk mund të regjistrojnë komisionerë pasi nuk janë regjistruar në zgjedhje. /Opinion.al
