23-vjeçari Gersian Dumi që sapo kishte filluar punë si ushtar profesionist në Forcat e Armatosura u arrestua nga policia dy ditë më parë pasi me një adresë false në Facebook shantazhonte kolegen e tij, E.K që të kryente marrëdhënie seksuale me të, në të kundërt do t’i publikonte një video intime.
Vënia e tij në pranga është bërë pranë “vilave gjermane”, në një hotel ku 23-vjeçari i kishte lënë takim koleges së tij. Por e gjitha ishte një kurth, pasi vajza kishte bërë kallëzim në polici. Skenari i të riut ndryshoi kur në vend të koleges ushtarake që ngacmonte u përball me efektivat e policisë, që i vunë prangat dhe e shoqëruan në ambientet e izolimit.
Historia
Dumi ka biseduar disa herë me të dëmtuarën, të cilës i ka bërë edhe komplimente të ndryshme dhe në fund i ka kërkuar të takoheshin e të krijonin një raport seksual. Duke qenë se e dëmtuara, efektive e ushtrisë, ka kundërshtuar dhe ka vendosur të ndërpresë komunikimin, 23-vjeçari, sipas hetuesve, ka nisur ta kërcënojë.
Ai ka pretenduar e kishte foto dhe video intime të koleges dhe e ka shantazhuar atë se, nëse nuk pranonte të kryente marrëdhënie seksuale me të riun, materialet intime do të bëheshin publike.
