Kryetari i partisë ‘Zgjidhja’, Koço Kokëdhima, është shprehur të hënën se i ka dërguar një letër ambasadorit të SHBA-ve, Donald Lu-së, por ka preferuar të mos e zbulojë atë.
Kokëdhima tha në emisionin ‘Opinion’, se nuk mund të botohen fakte të pavërteta, në lidhje me personin e tij, duke nënkuptuar se letra ka lidhje me deklaratën e pak ditëve më parë, kur ambasadori Lu, gjatë një takimi të shoqërisë civile, përmendi edhe emrin e kreut të “Zgjidhja”, mes ish-zyrtarëve dhe ish-deputetëve që u larguan nga detyra si rezultat i funksionimit të ligjit të dekriminalizimit dhe punës së gazetarëve kurajozë.
Kreu i ‘Zgjidhjës’ theksoi se nuk është gjykuar dhe nuk ka qenë pjesë e ndonjë hetimi, pasi nuk mund të jetë pjesë e korrupsionit, pasi papajtueshmëria e mandatit nuk është krim.
Ai deklaroi se ata gjykatës të korruptuar në bashkëpunim me Edi Ramën dhe Sali Berishën, kontribuan në heqjen e mandatit e të tij.
