Koço Kokëdhima kishte premtuar se do të fliste për rolin e ambasadorëve në vendin tonë. Duke nënkuptuar se ka të tjera gjëra nga ato që shihen dhe dëgjohen. Por kjo s’ka ndodhur. Në deklaratën e tij për mediat, që vjen si formë përgjigje ndaj akuzave të Lu-së, Kokëdhima, thjesht dhe vetëm ka mbrojtur veten duke dhënë disa argumente se pse ai nuk është i korruptuar.
Kujtojmë se dy ditë më parë, ambasadori Lu tha ndër të tjera se “ligji i dekriminalizimit ka larguar disa politikanë të korruptuar, mes tyre dhe Kokëdhimën”. Në përgjigje të tij, Kokëdhima, bëri dje një status në facebook ku paralajmëronte konferencen e sotme dhe ku shprehej se: “Do të flas edhe për rolin e diplomatëve të huaj në Shqipëri”.
Por kjo s’ka ndodhur….
Më poshtë deklarata e plotë e Kokëdhimës, dhënë mesditën e sotme
Zoti Donald Lu e ka bërë këtë deklaratë nisur nga vendimi i Gjykatës Kushtetuese, e cila konstatoi papajtueshmërinë e mandatit tim në Maj të këtij viti.
Theksoj, se për mua nuk është konstatuar asnjë shkelje nga Kushtetuesja, nuk jam gjykuar dhe shpallur fajtor. Ajo nuk më ka dyshuar, gjykuar, dënuar dhe cilësuar as si të inkriminuar, e as të korruptuar.
Në pikën 22 të vendimit thuhet shprehimisht se “që nga dita që Kokëdhima është bërë deputet, kompania e tij nuk ka lidhur asnjë kontratë me entet shtetërore.
Kush është krimi që kam bërë? Mund të konsiderohet krim fakti që në 1998 themelova Abisnetin, të parën shoqëri të licencuar në vend për shërbimet e internetit?
Mund të konsiderohet krim fakti që Abisnet ka lidhur kontrata të ligjshme për të shitur shërbimet e tij, ka paguar rregullisht taksat, ka punësuar qindra djem e vajza të talentuar dhe u ka shërbyer klinetëve të tij.
Vendimi i Kushtetueses u diktua politikisht. Në momentin e përshtatshëm do të publikoj fakte të qarta që hedhin dritë mbi këtë ngjarje, për këto arsye e kam ankimuar këtë vendim në Gjykatën e Strasburgut.
Unë jam 57 vjec, kam mbaruar dy shkolla të larta me rezultate të shkëlqyera. Gjithë jetën ia kam kushtuar familjes dhe biznesit tim. Jam biznesmen që ditën e parë kur u lejua sipërmarrja private në vend.
Prej 20 vitesh kam themeluar e drejtuar mediat e grupit tim, kam bashkëpunuar me mijëra njerëz dhe kam krijuar aq shumë njohje në vend. Kam qenë në opozitë thuajse me të gjithë qeveritë e tranzicionit, nuk jam proceduar asnjëherë të vetme, asnjëherë të vetme nuk jam gjykuar për ndonjë arsye as në vend e as jashtë vendit.
Një pjesë e madhe e gazetarëve të Shqipërisë kanë punuar me mua, mijëra të tjerë në kompanitë e mia, dhe Shqipëria është vend i vogël, të gjithë njihen. Askush në Shqipëri nuk e beson një deklaratë që më cilëson mua si njeri të inkriminuar.
Në cdo rast unë i kam sugjerur drejtuesve të PS të mos lejojnë të përfshijnë njerëz me rekorde kriminale në pozicione shtetërore.
Zoti Donald Lu më cilëson mua si politikan të korruptuar. Kjo deklaratë nëpërkëmb në mënyrë flagrante jo vetëm etikën diplomatike, por edhe atë qytetare.
Ambasadori i nderuar e bën këtë akuzë pa asnjë provë, pa asnjë fakt, pa iu referuar asnjë burimi dhe më rreshton mua me njerëz të dënuar për vepra nga më të rënda penale në gjykata të ndryshme.
Gjithë jetën kam punuar në biznesin tim. Mediat që unë kam drejtuar janë ndeshur ditë për ditë me qeveritë e korruptuara të këtij vendi dhe kane qenë tribuna e luftës kundër korrupsionit. Për 20 vite me radhë kam paguar kostot e kësaj lufte dhe qendrese të pashembullt.
Do ta kisha shumë më të lehtë të bëhesha me qeveritë si shumë media të tjera.
Por nuk e kam bërë kurrë, kam qëndruar në anën e qytetarëve dhe jo të pushtetit, pasuritë i kam bërë me punë të ndershme, nuk erdha në politikë për të bërë para dhe as për të punuar për vete. Erdha në politikë i pasur për të punuar për vendin dhe një karrierë të shëndetshme.
Shumë nga qeveritarët hyjnë në politikë të varfër dhe u bënë milionerë me korrupsion dhe duke tradhëtuar interesat e vendit.
Ja çfarë ka dhënë Donald Lu për Kokëdhimën
E para, siç e dini, me anë të reformës në drejtësi – për Shqipërinë po vijnë ndryshime të mëdha për sa i përket krijimit të prokurorisë së posaçme dhe Byrosë Kombëtare të Hetimit, BKH, të cilat do të jenë në gjendje të luftojnë korrupsionin e nivelit të lartë si kurrë më parë. Së dyti, për dekriminalizimin, i kemi dhënë lamtumirën një numri politikanësh kriminelë dhe të korruptuar – mes tyre, më vijnë në mend Xhelili, Frroku, Muhameti, Petraj, Ndoka dhe Kokëdhima. Kemi edhe nja dy që po përballen me akuza penale – Prenga dhe Rroshi – por teksa flasim janë në gjyq. Mendoj që ky është përparim i jashtëzakonshëm, jo vetëm në legjislacion por edhe i kulturës. Populli shqiptar është i lodhur nga këta zyrtarë të korruptuar dhe do që të shohë ndryshim.
