Dy të arrestuarit për 613 kg kokainë në Durrës, Donaldo Lushaj dhe Armando Pezaku do të mbeten në burg. Gjykata e Apelit për Krimet e Rënda la në fuqi masën e sigurisë “arrest me burg” caktuar në Shkallën e Parë për dy të ndaluarit. Lushaj dhe Pezaku kishin apeluar masën e sigurisë, duke kërkuar lirinë.
Avokatët janë shprehur se klientët e tyre nuk kishin asnjë lidhje me sasinë e drogës së fshehur në kontenierin me banane që vinte nga Kolumbia. Por gjykata ka rrëzuar kërkesën e tyre për ndryshim të masës së sigurisë “arrest me burg”.
Shoferi i kontenierit, që sillte banane për llogari të kompanisë “Arbi Garden”, Pezaku dhe menaxheri i kësaj firme, Lushaj janë dy të arrestuarit e vetëm për sasinë rekord të kokainës. Në kërkim ndërkombëtar është shpallur pronari i kësaj kompanie Arbër Çekaj. Ai dyshohet se u largua drejt Gjermanisë 3 ditë para se të zbulohej droga në Durrës.
