“Në datën 26 gusht 2019 policia greke ka njoftuar autoritetet shqiptare se në dy kontenierë, që janë nisur nga Ekuadori drejt Shqipërisë janë gjetur përkatësisht 25 kg e 231 gramë kokainë në një kontenier dhe në 20 kg e 570 gram në kontenierin tjetër. Pakot e drogës ishin të vendosura në pjesën e motorëve të frigoriferëve. Nga autoritetet është lejuar dorëzimi i kontrolluar. Në rastin konkret droga është bllokuar në Pire, në Greqi. Kjo bëhet në rastet kur autoritetet kanë dyshime për mungesë besimi tek autoritetet që do dërgohen. Kur u bë zëvendësimi i drogës me oriz kanë qenë oficerë të DEA-s, prokurori shqiptar i krimeve të rënda dhe efektivë të policisë shqiptare”.
Kështu deklaroi gazetarja Klodiana Lala në emisionin Opinion, në lidhje me operacionin e koduar Kuito, ku u sekuestruan 137 kg kokainë që kishte si denstinacion Durrësin, ndërsa ndodhej në kontenierë me banane që ishin nisur nga Ekuadori.
“Në fakt unë kam patur vonesa të kontenierëve. Mua nuk më bëri ndonjë përshtypje, apo të alarmohesha pse kjo vonesë. Ardhja e tyre ne portin e Durrësit ishte ardhje normale”, tha Eduard Dauti, pronar i kompanisë “Alba Exotic Group”, brenda kontenierve të së cilës u u gjend kokaina.
Ai mohoi se në punën e tij nuk ka patur asnjëherë bashkëpunim me Arbër Cekaj, i cili akuzohet se trafikoi nga Kolumbia sasinë rekord të kokainës 613 kg, që u kap në Shkurt të vitit të kaluar në Portin e Durrësit./ Opinion.al
