Ditën e djeshme u sekuestruan 11 kg e 675 gr kokainë në Portin e Durrësit në një kontenier që vinte Ekuatori. Ndërkohë ditën e sotme në një intervistë për mediat administratori i kompanisë, në kontenierët e së cilës u sekuestrua lënda narkotike ka folur në lidhje me ngjarjen.
Në një lidhje nga Franca për news 24, Eduart Dauti, i shpallur në kërkim, mohoi që droga të ketë lidhje me të, duke iu kërkuar autoriteteve shqiptare të hetojnë dhe të zbulojnë porositësit dhe trafikantët e vërtetë.
“Unë si tregtar importoj vetëm fruta. Fruta kam në kontejner, asgjë tjetër. Çfarë ndodh jashtë nuk kam asnjë lloj përgjegjësie. Aty kanë të bëjnë autoritetet. Përgjegjësia ime është vetëm pas skanerit. Pasi kalon në skaner, mua më jepet konfirmimi për ta marrë. Asgjë nuk vjen te ne pa kaluar më parë në skaner dhe ne të gjithë e dimë se po kalove në skaner, je i zënë. Kush e rrezikon veten e vet për 10 kg drogë”, thotë ai.
Më tej, ai ka deklaruar se ndodhet në Francë për ditëlindjen e vajzës, teksa thekson se do të kthehej por do t’i vinin prangat padrejtësisht në aeroport. Po ashtu ai thotë se e njëjta situatë i ka ndodhur edhe më parë por u shpëtua nga DEA.
“Doja të kthehesha sot, por nuk isha aq trim, sa të vija, se do më vinin prangat. Më kanë arrestuar një vëlla. Krimineli nuk ka çfarë humbet, se humbi disa dollarë, por unë humbas milionat e mi, humbas dinjitetin. Jam i gatshëm të përballem, por nuk dua të më vënë prangat sa të vij në aeroport, sikur të jem kriminel. Unë drejtësi kërkoj, ne vuajmë për drejtësi. Pse nuk e lanë drogën të kalonte dhe ta shikonin kush do ta merrte. E kanë të lehtë t’i vënë prangat direkt biznesit, por të inkriminuarit janë vetë ata të Portit, vetëm ata kanë akses. Kaq pabuks jam, kaq i uritur? Pse duhet ta bëj një gjë të tillë. Unë e kam biznesin të suksesshëm, është fitimprurës, dhe jam i lumtur për këtë. Pse duhet të rrezikoj jetën tim dhe sot po fshihem si miu.
Ne nga ky biznes po jetojmë, javë për javë kam kontejner. Se jam i pikasur nga kriminelët, duhet ta bëjë shteti punën, nga ta di unë. Nuk po bëjmë dot biznes, nuk shkoj dot në Portin e Durrësit. Herën e kaluar më shpëtoi DEA, se ata bënë hetimin e saktë dhe ua zhdukën orizin, i lanë pa pilaf e pa sultjash. Kam frikë nga padrejtësia, nga asgjë tjetër. Nëse ka drejtësi dhe gjykohet saktë, të bëhet një hetim dhe të shihet kush e sjell drogën, kush e importon. Unë nuk jam as importues, as shitës, as blerës. Nuk kam lidhje fare me këto gjëra. Nëse jam unë përgjegjës, 7 pashë nën dhe të më fusin”, tha ai./Opinion.al
