Alket Dauti, 31-vjeç, i njohur si kreu i një rrjeti të organizuar kriminal të trafikut të emigrantëve drejt Britanisë së Madhe është ekstraduar në Belgjikë, ku rezulton i dënuar me 10 vite burg.
Dauti jetonte në Penge të Britanisë, ndërsa u arrestua nga oficerë të Agjencisë Kombëtare të Krimit në qershor të 2018-ës.
31-vjeçari ishte koka e një rrjeti kriminal që merrej me organizimin e trafikimit të emigrantëve drejt Britanisë së Madhe.
Sqarohet se arrestimi i tij, ishte pjesë e një hetimi të përbashkët belgo-britanik në lidhje me një grup kriminal që përdorte shoferët e korruptuar të kamionëve që transportonin burra, gra dhe fëmijë në Britani të Madhe.
Prokurorët belgë bënë me dije se ky rrjet ishte i përfshirë në qindra përpjekje për të dërguar në mënyrë të paligjshme njerëz drejt Britanisë.
Banda dyshohet se trafikonte shqiptarë, të cilët paguanin shifra të mëdha parash për të qëndruar në hotele në Belgjikë, përpara se të shkonin në Britani.
Dauti u dënua në mungesë nga një gjykatë belge më 14 dhjetor 2018 dhe iu dha një dënim me burg prej 10 vitesh dhe një gjobë prej 720,000 euro./Rel.d/
