Presidenti i Republikës, Ilir Meta ka reaguar sërish për borxhin publik. Në një postim në rrjetet sociale, Meta i ka bërë sërish thirrje Kuvendit dhe institucionet financiare që të bëjnë një vlerësim real të borxhit publik.
Kreu i Shtetit shkruan se ekonomia nuk mund të lihet në dorë të aventurierëve që duan të falimentojnë Shqipërinë.
Sipas Metës, koha e gallatës me ekonominë dhe taksat e shqiptarëve ka marrë fund.
“E përshëndes reagimin e përgjegjshëm dhe profesional të ekspertëve vendas të ekonomisë për nivelin tepër shqetësues të borxhit publik.
Duke vlerësuar situatën kritike, për të parandaluar një humnerë ekonomike e financiare, si dhe drama të mëtejshme sociale, përsëris thirrjen drejtuar Kuvendit dhe institucioneve financiare vendase dhe të huaja, për të bërë sa më parë një vlerësim real dhe transparent të borxhit publik duke përfshirë të gjitha detyrimet aktuale dhe ato të pritshme të Republikës së Shqipërisë.
Koha e gallatës me ekonominë dhe taksat e shqiptarëve duhet të marrë fund!
Ekonomia nuk mund të lihet më në dorën e aventurierëve, që duan të falimentojnë Shqipërinë!”-shkruan Meta./Opinion.al
