Gjykata e Apelit i dha të drejtë Kolonel Dritan Demirajt për tu kthyer në Forcat e Armatosura. Demiraj, aktualisht ministër i Brendshëm teknik është në gjyq prej tre vitesh me Ministrinë e Mbrojtjes, pasi është larguar padrejtësisht nga FA.
Pasi Apeli vendosi të favor të Demirajt, reagon Ministria e Mbrojtjes e drejtuar nga socialistja Mimi Kodheli. Në një njoftim për mediat thuhet se Kodheli do ta çojë çështjen në Gjykatën e Lartë, sapo të marrë të zbardhur vendimin e Apelit.
“Gjykata Administrative e shkallës së parë i ka dhënë të drejtë Ministrisë së Mbrojtjes për vendimin që ka marrë për largimin nga FA të kolonelit në lirim Dritan Demiraj. Gjykata e Apelit vendosi dje të pranojë padinë e kolonelit në lirim. Në këto kushte, mënjëherë sapo të njihemi me vendimin e gjykatës të zbardhur, Ministria e Mbrojtjes do të ushtrojë rekurs përpara gjykatës së lartë”, thuhet në njoftimin e Ministrisë së Mbrojtjes. /Opinion.al
