Ministrja e Mbrojtjes kërkon të gjobisë ish-shefin e Shtabit të Ushtrisë, Xhemal Gjunkshi 4 vjet pasi ky i fundit u largua nga detyra.
Në kulmin e fushatës elektorale, ministrja Mimi Kodheli njëherësh kandidate për deputete në Kukës çon në gjykatë padinë ndaj ish-shefi i Shtabit, njëherësh i dyti në listën e kandidatëve për deputet të PD-së në Dibër.
Kodheli pretendon se gruaja e Gjunkshit në kohën kur ky i fundit ishte shef shtabi ka shpenzuar 6600 euro për bileta avioni. Sipas saj këto para kanë dalë nga buxheti i Ministrisë së Mbrojtjes.
Në padi thuhet se kjo shumë e taksapaguesve shqiptare është keqpërdorur nga Gjunkshi në kohën kur mbante postin e shefit të përgjithshëm të shtabit të FA, jo për nevojat e shtabit, apo të forcave të armatosura, por për udhëtime jashtë vendit për bashkëshorten.
Dhe si e tillë, Ministria e Mbrojtjes ka nisur procedurat ligjore për kthimin mbrapsht të shumës prej 6600 euro, nga ish-shefi i shtabit Xhemal Gjunkshi.
Nga ana tjetër Gjunkshi pretendon se nuk ka marrë nga Ministria pagat kalimtare që i takonin sipas ligjit në momentin kur është larguar nga detyra. Padia në fjalë është regjistruar në dhomën civile të Gjykatës së Tiranes dhe gjykohet nga gjyqtarja Rezarta Balliu, e cila në seancën e parë të zhvilluar mesditën e së mërkurës ka vendosur të pezulloje me kërkesë të palëve gjykimin e kësaj padie deri në një vendim të dytë.
