Koço Kokëdhima ka reaguar në lidhje me vendimin e Gjykatës Kushtetuese ku e shpalli si të papajtueshëm me kushtetutën, mandatin e deputetit të Vlorës.
Me anë të një shënimi në profilin personal në facebook, Kokëdhima shkruan se Gjykata Kushtetuese vendosi pranimin e kërkesës së PD-së për konstatimin e papajtueshmërisë së mandatit tim të deputetit.
“Nuk do të bëj asnjë koment rreth vlerësimeve tona për integritetin e Gjykatës, profesionalizmin apo për influencimin e saj në këtë proces tërësisht politik, qysh në nisjen e tij 2 vjet më parë. Do te presim vendimin e arsyetuar, për të kuptuar më mirë dhe plotësisht natyrën e këtij gjykimi. Në këto orë, kam marrë qindra mesazhe nga të gjitha anët e Shqipërisë, por veçanërisht nga socialistët e bazës dhe mbështetësit e Partisë Socialiste, nga miqtë dhe të njohurit e mi. I falenderoj nga zemra për solidaritetin e treguar”, shkruan Kokëdhima.
Ai thekson se me apo pa mandat Deputeti, unë do të punoj pa u reshtur për Ju dhe për një Shqipëri më të mire.
“Gjithë jetën time kam punuar me pasion për nje jetë më të mirë jo vetëm për familjen time. Rruga ime në politikë nuk mbaron këtu. Ajo është vetëm në fillimet e saj”, përfundon shënimin në profilin e tij, Koço Kokëdhima.
