Sekretari i Përgjithshëm i Partisë Demokratike, Gazment Bardhi, ka reaguar pas akuzave të bëra nga mazhoranca në lidhje me koalicionin që PD nënshkroi me Lëvizjen Socialiste për Integrim.
Përmes një postimi në “Twitter”, Bardhi shkruan se Ramën e ka kapur paniku, teksa thekson se LSI dhe PD janë bashkuar për të sjellë ndryshimin në Shqipëri. Sipas Bardhit Rama ka dështuar në të gjitha fushat.
“Edi Ramën e ka kapur paniku, sepse ka kuptuar që sot ka nisur fundi i tij. Rama e kupton që më 25 prill do të shkojë në shtëpi. Ne u bashkuam që të sigurojmë ndryshimin në Shqipëri dhe atë ndryshim do ta sjellim ne: shpresa të reja për të gjithë dhe plane serioze pune në të gjitha fushat, ku Rama ka dështuar për 8 vjet me radhë: ekonomi, shëndetësi, arsim, emigrim, infrastrukturë. Kohës tënde i ka ardhur fundi, Rama. Ka ardhur çasti të ndryshojmë”, shkruan Bardhi.
Më herët gjatë seancës në Kuvend, Ministrja e Shtetit për Marrëdhëniet me Parlamentin, Elisa Spiropali, ironizoi koalicionin opozitar duke thënë se opozita nuk ka sjellë asnjë emër të ri në zgjedhjet e 25 prillit, dhe i cilësoi kandidatët për deputetë si “mercenarë, të shitur, e të blerë”./Opinion.al
