Thuajse të gjithë refuzojnë Superligën e Europës. Pavarësisht fitores në Gjykatën Europiane, eventi i ri i propozuar nga kompania A22 Sports ka vetëm dy klube që e mbështesin: Realin e Madridit dhe Barcelonën.
Të tjerët janë të gjithë kundër. Nga nivelet më të ulëta të futbollit kontinental, deri te klubet më të mëdhenj, që kanë shkruar historinë e këtij sporti.
Manchester United apo Chelsea, pavarësisht se janë në pronësi të amerikanëve dhe në fillim iu bashkuan projektit, tani theksojnë se do të vijojnë të luajnë në aktivitetet e UEFA-s. Qëndrimi është i ngjashëm nga të gjitha klubet e Premier League, që mbetet kampionati më i fortë dhe më fitimprurës në botë.
Edhe Bayern Munchen ia ka mbyllur derën Superligës Europiane, ashtu si Paris Saint German apo edhe Manchester City, që mbështeten nga financat arabe.
Në Spanjë, të gjitha skuadrat përveç Realit dhe Barçës janë pozicionuar kundër. Nga Atletico Madrid, te Sevilla e Villarreal, të gjitha ekipet do të zbresin në fushë me mesazhin “Fitojeni në fushë”.
Për të shmangur rrezikun që klubet t’i bashkohen Superligës Europiane, qeveria angleze ka marrë hapa konkretë. Së shpejti, do të prezantohet legjislacioni i cili i ndalon klubeve pjesëmarrjen në çdo aktivitet alternativ në të ardhmen. Me daljen nga Bashkimi Europian, Mbretëria e Bashkuar e ka më të lehtë të vendosë ligje të tilla.
Megjithatë, edhe vendet e Bashkimit Europian do të takohen në Bruksel më 10 janar, për të dalë me një vendim të unifikuar kundër projektit të Superligës.
