Kryetarja e KQZ-së, Lefterije Luzi, ka reaguar pas kallëzimit penal të dorëzuar nga KLSH-ja në Prokurori, duke thënë se për këtë çështje ka folur një herë Drejtësia.
Luzi tha për “Panoramën” se në vitin 2013 PS-ja dërgoi për ndjekje penale KQZ-në për projektin e numërimit dhe votimit elektronik, por organi i akuzës konstatoi se nuk ka shkelje ligjore. “Unë sot jam njohur nga media për kallëzimin e KLSH-së në Prokurori. Le t’ia lëmë këtë çështje ta sqarojë Drejtësia, pastaj do të flas unë me të njëjtën gjuhë. Prokuroria ka folur një herë për këtë çështje në vitin 2013 dhe ka vendosur që nuk ka elemente të shpërdorimit të detyrës. Me qenë se ky zotëria ka aluduar dhe pretendon për shkelje, e ka çuar sërish çështjen në Prokurori, ta lëmë Prokurorinë të flasë. Dhe unë do të flas pasi të shprehen institucionet e Drejtësisë”, tha kryetarja e KQZ-së. “Panorama” ka siguruar edhe vendimin e Prokurorisë së vitit 2013. Kërkesa për ndjekje penale të 4 anëtarëve të KQZsë është bërë edhe nga ministri aktual, Damian Gjiknuri, asokohe sekretar për Çështjet Zgjedhore në PS.
Në vendimin e prokurorit Julian Xhenga shkruhet: “Rezulton se procedurat e ndjekura për përmbushjen e projekteve SEV dhe SEN, për vetë objektin e tyre dhe rëndësinë e veçantë që përfaqësonin, diktoheshin nga interesa thellësisht të shtetit. Pra, pa vlerësuar besueshmërinë e veprimeve të përshkuara dhe analizuara më sipër të anëtarëve të KQZ-së dhe punonjësve të administratës së këtij institucioni dhe argumenteve të dhëna prej tyre, rezulton se këto veprime nuk vijnë ndesh me ndonjë dispozitë ligjore që rregullon procedurat e prokurimit publik në Republikën e Shqipërisë. Duke u bazuar në sa më sipër dhe, mbështetur në nenin 328/1 (b) (fakti nuk parashikohet nga ligji si vepër penale) të Kodit të Procedurës Penale, vendosa: 1Pushimin e hetimeve për procedimin penal nr.67642013 për veprën penale të ‘shpërdorimit të detyrës’, të parashikuar nga neni 248 i Kodit Penal”./ Panorama.al
