Pas mbledhjes së sotme Këshilli i Lartë i Prokurorisë bëri të ditur se do miratojë brenda 30 ditëve, tetë emrat e prokurorëve të SPAK, të cilët do të nisin punën për të hetuar rastet e krimit të organizuar dhe korrupsionit.
Sipas njoftimit të KLP-së të publikuar në faqen zyrtare, tetë prokurorët që kaluan sitën e vettingut janë: Altin Dumani, Arben Kraja, Klodian Braho, Enkeleda Millonaj, Edvin Kondili, Ened Nakuçi, Elida Kaçkini dhe Behar Dibra.
Këshilli i Lartë i Prokurorisë ka miratuar gjithashtu në mbledhjen e sotme edhe disa ndryshime në emërimet e prokurorëve.
Sipas vendimit të KLP janë emëruar përkohësisht tre drejtues të rinj prokurorish. Konkretisht, Lorenc Mërkuri është emëruar Drejtues i Prokurorisë pranë Gjykatës së Shkallës së Parë Sarandë, Ludovik Doda është emëruar Drejtues i Prokurorisë pranë Gjykatës së Apelit Durrës dhe Erion Çela, Drejtues në Prokurorinë pranë Gjykatës së Shkallës së Parë Vlorë.
Prokurorët e tjerë që janë emëruar janë: Afërdita Ndoi, prokurore në Prokurorinë pranë Gjykatës së Apelit Durrës, Albert Murçaj, prokuror në Prokurorinë pranë Gjykatës së Shkallës së Parë Shkodër, Ylli Pjetërnika, prokuror në Prokurorinë pranë Gjykatës së Shkallës së Parë Tiranë, Lazër Çardaku, prokuror në Prokurorinë pranë Gjykatës së Apelit Shkodër, Isa Jata, prokuror në Prokurorinë pranë Gjykatës së Apelit të Krimeve të Rënda, Urim Buci në Prokurorinë pranë Gjykatës së Shkallës së Parë Dibër. /Opinion.al
