Përveçse me një parlament të ri, vjeshta do të vijë edhe me një tjetër garë elektorale për partitë politike.
Berati, Tepelena dhe Mati, që mbetën pa kryetar për shkak se kandidatët për bashki garuan për deputet, do të zgjedhin kryetarin e ri në një garë që mund të zhvillohet duke filluar nga shtatori.
“Tre bashkitë të cilat janë në garë në bazë të tërheqjes së kryetarëve të bashkive, Bashkia e Matit, Beratit dhe Tepelenës, pa dyshim janë në planet organizative të Partisë Socialiste. Shkojmë për t’i fituar të treja bashkitë. Kemi filluar, të paktën në Mat, përzgjedhjen e kandidaturave për rifreskimin e gjithë strukturës sonë elektorale, dhe besoj edhe Berati e Tepelena,” tha Blendi Klosi, Sekretar i Përgjithshëm i PS-së.
Sekretari i Përgjithshëm i PS, Blendi Klosi, thotë se PS ka nisur punën me synimin për të dalë fituese.
“Të tre bashkitë, pa dyshim, do të shkojnë në zgjedhje dhe besoj se periudha e përcaktuar në Kod, pra vjeshta e këtij viti, është periudha e përshtatshme për ta kryer këtë proces.”
Po në shtator, PS pritet të mbledhë forumet për të vijuar me ndryshimet në strukturat e partisë.
“Shtatori, si gjithmonë, ka qenë momenti kur, së bashku me grupin e ri parlamentar, së bashku me qeverinë e re të dalë nga zgjedhjet e 11 majit, do të analizohen, gjykohen dhe do të vlerësohen të gjitha forumet e Partisë Socialiste.”
Sa i përket Tiranës dhe mundësisë për të zhvilluar zgjedhje për kryetar të ri, PS ende nuk ka një vendimmarrje.
Ndërkohë, për Erion Veliajn pritet vendimi i Gjykatës së Lartë.
Klan News
