Gjyqtarja e Krujës, Enkeleida Hoxha është pezulluar nga Këshilli i Lartë Gjyqësor pas arrestimit me urdhër të SPAK.
Vendimi nga KLGJ është marrë sot, pasi GJKKO e ka lënë gjyqtaren në masën e sigurisë “Arrest me burg”.
Gjyqtarja Hoxha, e cila prej kohësh ishte nën përgjim nga SPAK, akuzohet për veprat penale “Korrupsion” dhe “Shpërdorim detyre” pasi gjatë kohës që ishte në detyrë lironte persona me dënime për vepra të rënda penale, kundrejt përfitimeve personale.
Kujtojmë që në këtë skemë korrupsioni gjyqtarja Hoxha nuk ishte e vetmja, pasi bashkë me të u arrestuan dhe 9 persona të tjerë teksa rol kryesor në skemën korruptive kishin sekretarja e Gjykatës, Manuela Mallkuçi dhe avokati Aldo Tabaku. Gjithashtu pre e skemës kanë rënë edhe 2 mjekë dhe 1 infermiere.
Njoftim i Këshillit të Lartë Gjyqësor
Sot, në datën 15.02.2021, Këshilli i Lartë Gjyqësor zhvilloi mbledhjen plenare të radhës, në të cilën u njoh me vendimin e marrë nga Gjykata e Posaçme e Shkallës së Parë për Korrupsionin dhe Krimin e Organizuar, për magjistraten {…}, me detyrë gjyqtare në Gjykatën e Rrethit Gjyqësor {…}.
Pasi dëgjoi relatimin nga Komisioni Disiplinor, Këshilli me vendimin nr.53, pezulloi nga detyra magjistraten {…}, me detyrë gjyqtare në Gjykatën e Rrethit Gjyqësor {…}./Opinion.al
