Kryetari i Komisionit Qendror të Zgjedhjeve Klement Zguri i ka kërkuar Kuvendit që të mos lejojë partitë të shkelin afatet e proceseve administrimit të zgjedhjeve. Në raportin vjetor të institucionit, Zguri tha se debati politik nuk duhet të përfshijë në vorbull edhe KQZ-në.
“Përplasja politike, me shumë gjasë, nuk ka për ta lënë KQZ-në pa e përfshirë në vorbullën e saj, sepse përplasja politike do godasë dhe zgjedhjet lokale, së paku administrimin e tyre. Nëse ndodh, atëherë Kuvendi duhet t’i japë mbështetje të përforcuar KQZ-së, duhet të mbrojë pavarësinë e tij, duhet ta inkurajojë në zbatimin me fanatizëm të ligjit. Që zgjedhjet lokale të zhvillohen me sukses, ato kanë nevojë për një administratë të vendosur, të fortë, serioze e profesionale”, tha Zguri.
Çështja e kontratave të lobimit të Partisë Demokratike në SHBA ishte një pikë për të cilën deputetët kërkuan hetime nga KQZ. Por Zguri u shpreh se kanë qenë anëtarët e zgjedhur nga socialistët që nuk e kanë dashur një veprim të thelluar në lidhje me këtë çështje.
Gjithashtu, ai tha se në punën e saj KQZ nuk kishte gjetur bashkëpunimin e Drejtorisë së Përgjithshme të Gjendjes Civile.
“Lidhur me bashkëpunimin me Drejtorinë e Përgjithshme të Gjendjes Civile për përmirësimin e regjistrave dhe sistemit të adresave, nuk është bërë asgjë. Kemi hasur në indiferencën e Drejtorisë së Përgjithshme të Gjendjes Civile”, tha Zguri në raportin e tij në Kuvend./Opinion.al
