Klement Balili, personi më i kërkuar në Shqipëri, i cilësuar si Eskobari i Ballkanit ka folur ekskluzivisht për gazetarin investigativ, Artan Hoxha vetëm pak orë para arrestimit. Në këtë pjesë të intervistës, ai ka folur për lidhjet e tij me politikën dhe cilin subjekt politik ka mbështetur në fushatë elektorale. Balili tregoi se asnjëherë nuk ka pasur një teserë partie, madje është munduar të qëndrojë larg saj. Sipas tij, ka qenë përfshirja e familjarëve të afërt në politikë, duke mbështetur kështu Lëvizjen Socialiste për Integrim. Balili ka treguar edhe një moment nga takimi me ish-kryeministrin Sali Berisha në 2006 në Delvinë.
Pas zgjedhjeve të vitit 2013, kur koalicioni i majtë PS-LSI erdhi në pushtet dhe u rrëzua nga pushteti PD-ja, ju u emëruat në pozicionin e drejtorit rajonal të transporteve. Pse shkuat pikërisht në atë vend? Ju morët pjesë në fushatë? Çfarë qëndrimi keni mbajtur?
Familja ime ka kontribuar për këtë parti. Edhe unë kam kontribuar.
Për kë parti?
Për LSI-në. Kam kontribuar, pavarësisht se nuk jam ngatërruar me politikën, por kam ndihmuar thjesht familjarët. Dhe për këtë gjë m’u ofrua ky shpërblim, si post drejtori. Dhe unë e pranova dhe kam shërbyer në atë post. Nuk jam implikuar në korrupsion. Dhe kjo është një gjë që e faktojnë edhe provat.
Gjatë kësaj kohe, pra nga viti 2013 deri në vitin 2016 kur ndodhi kjo, jeni përfshirë në aktivitete politike? Kanë qenë zgjedhjet lokale të vitit 2015. Ju si drejtues i rëndësishëm i një sektori në zonën e Sarandës dhe të Delvinës, gjatë kësaj kohe jeni përfshirë, duke pasur parasysh që nipi juaj kandidonte?
Po, normal që jam përfshirë. Kam kontribuar.
Fillimisht familja juaj ka mbështetur të djathtën, për shkak edhe të origjinës.
Po.
Nëse e kujtoni, e keni takuar ndonjëherë Sali Berishën?
Po, para shumë kohësh, kur vinte në zonën e Delvinës. Ka kaluar në fshatin tim, ka ardhur edhe në banesën time. Unë kam qenë i vogël atëherë, e kam takuar, i kam dhënë edhe dorën. Vetëm atë person.
Po më pas, kur ka qenë kryeministër?
Jo, jo.
Mban mend ndonjë rast kur ka ardhur në Delvinë?
Kur ka ardhur në Delvinë një herë, ndoshta në vitin 2006.
