Në rrjete sociale është përhapur masivisht një thirrje për protestë për rastin, tashmë shumë të përfolur të Xhisielës. Aktivistë nga shoqëria civile por dhe qytetarë të indinjuar nga rasti prej ditësh kanë lajmëruar protestën e sotshme, përballë kryeministrisë, në orën 17:30.
Thirrjes i janë bashkuar shumë qytetarë por dhe deputetë të forcave të opozitës. Një ndër to është dhe Klajda Gjosha.
Deputetja e Lëvizjes Socialiste për Integrim, ka reaguar me anë të një statusi në Facebook në lidhje me ngjarjen e rëndë të ndodhur në Komisariatin e Fushë – Krujës.
Sipas Gjoshës, rasti i Xhiselës është momenti që të gjithë ne të zgjohemi nga gjumi i thellë.
Statusi i plotë
Ngjarjet e fundit të dhunës së ushtruar ndaj një vajze të re dhe aq më tepër nga njerëz publik dhe të pushtetshëm, kanë tronditur opinionin publik dhe gjithë shoqërinë. Sot Xhisela përveç dhunës fizike po përjeton dhunën mediatike dhe atë të institucioneve shtetërore. Është e vetme përballë terrorit shtetëror, policisë së shtetit, prokurorisë dhe partisë shtet!
Ekspertiza mjeko ligjore sapo ka vërtetuar realitetin e hidhur të përjetuar nga një vajzë e re, djegien me cigare në trupin e saj dhe traumën psikologjike të shkaktuar nga njerëz të pamëshirshëm! Rasti i Xhiselës është si zilja e mëngjesit që të kujton se është momenti për t’u zgjuar nga gjumi i thellë. Rasti i Xhiselës është vetëm një prej mijëra rasteve të tjera të fshehura dhe të abandonuara nga institucionet shqiptare. Rasti i Xhiselës është emergjencë kombëtare!
I bëj thirrje institucioneve ndërkombëtare ta marrin në mbrojtje këtë vajzë të lënë jetime nga shteti, të ruajnë jetën e saj dhe të zbardhin të vërtetën tronditëse që fshihet pas këtij rasti të paprecedent!
