Policia ka shpëtuar një 19-vjeçar i cili kishte rënë nga lartësia e një shkëmbi te “Shpella e Piratëve” në Dhërmi.
Uniformat blu bëjnë me dije se i kanë ardhur në ndihmë 19-vjeçarit duke e nxjerrë nga një terren shumë i vështirë mbi shkëmbinj dhe mbi gurë.
Nga informacionet zyrtare mësohet se ai është transportuar për në spital, ku ka marrë ndihmë mjekësore.
“Menjëherë pas marrjes së njoftimit se një shtetas 19 vjeç, kishte rënë nga një shkëmb i zonës së quajtur “Shpella e Piratëve”, shërbimet e Stacionit të Policisë Kufitare Dhërmi, me njësi nga toka dhe nga deti, të pajisura me 2 mjete lundruese dhe të asistuara nga shërbime mjekësore, kanë mbërritur në zonën e sinjalizuar, me qëllim ofrimin e ndihmës për 19-vjeçarin.
Si rezultat i ndërhyrjes së shpejtë të shërbimeve të specializuara, 19-vjeçari u nxorr nga një terren shumë i vështirë mbi shkëmbinj dhe mbi gurë. Këtij shtetasi iu ofrua asistencë mjekësore në vendngjarje, ndërsa më pas, u transportua në spital, për të marrë asistencë më të specializuar, ku ndodhet në gjendje të mirë shëndetësore”, tha policia./Opinion.al
