Një djalë 11-vjeçar amerikan është arrestuar pasi kishte kërcënuar se do të sulmonte me armë një shkollë në Silver Sands, në Florida.
Sipas sherifit të zonës, ai kishte një listë me emra dhe objektiva.
Djali, nga Port Orange, akuzohet se ka treguar “disa armë” gjatë një bisede me miqtë dhe ka kërcënuar se do të kryente të shtënat në shkollën e mesme Creekside ose Silver Sands, tha zyra e sherifit në një njoftim për shtyp.
Detektivët u lajmëruan përmes aplikacionit “Fortify Florida”, i cili u lejon njerëzve të bëjnë raporte anonime për aktivitete të dyshimta tek autoritetet e zbatimit të ligjit dhe zyrtarët e shkollës.
Zyra e sherifit publikoi emrin e fëmijës, fotografinë dhe një video të tij duke u shoqëruar në burg.
Autoritetet kontrolluan dhomën e fëmijës dhe dyshohet se gjetën një numër të madh pushkësh me ajër, pistoleta dhe municione të rreme së bashku me thika, shpata dhe armë të tjera.
Arrestimi i 11-vjeçarit erdhi disa ditë pasi dy nxënës të shkollës së mesme Heritage u morën në paraburgim. Zyra e Sherifit të Qarkut Volusia tha në një njoftim për shtyp të premten se dy adoleshentë, të moshës 13 dhe 14 vjeç, dyshohet se kanë postuar kërcënime në TikTok dhe Instagram. Ata të dy u akuzuan për vepër penale të kërcënimeve me shkrim për të vrarë.
Shkollat e qarkut Volusia thanë në një deklaratë të përbashkët me zyrën e sherifit se “siguria është prioriteti numër një” dhe se çdo kërcënim i mundshëm është hetuar tërësisht./Opinion.al
