Kishte me vete armë zjarri dhe lëvizte me taksi në Tiranë për të shmangur kontrollet e policisë, arrestohet 23-vjeçari banues në Lezhë.
Blutë e Tiranës finalizuan operacionin e koduar “Destinacioni”, ku është sekuestruar arma e zjarrit me municion, si dhe u procedohet penalisht kushëriri i 23-vjeçarit, i cili e shoqëronte në mjet.
“Gjatë operacionit, u ndalua në Rrugën e Dibrës, taksia me të cilën lëviznin shtetasi P. Gj., 23 vjeç dhe kushëriri i tij, shtetasi Xh. Gj., 24 vjeç, të dy banues në Lezhë. Nga kontrollet, në çantën e 23-vjeçarit, u gjet 1 armë zjarri pistoletë me municion. Në përfundim të veprimeve procedurale në lidhje me këtë rast, shtetasi P. Gj. u arrestua për veprën penale “Mbajtja pa leje dhe prodhimi i armëve, armëve shpërthyese dhe i municionit”, ndërsa 24-vjeçari u procedua në gjendje të lirë, për veprën penale “Moskallëzimi i krimit””, thuhet në njoftimin e policisë.
Materialet procedurale iu referuan Prokurorisë së Tiranës, për veprime të mëtejshme.
