Një konflikt i nisur në Snapchat mes dy adoleshentëve është zhvendosur në oborrin e shkollës së mesme “Mustafa Hoxha” në Cakran të Fierit, aty ku mëngjesin e kësaj të premte një 17-vjeçar plagosi me thikë në krah një bashkëmoshatarin e tij.
I mituri që u plagos u dërgua në spital jashtë rrezikut për jetën, ndërsa autori është shoqëruar në komisariat, ndërsa është sekuestruar mjeti prerës. Vetë i dëmtuari ka rrëfyer ngjarjen se si ndodhi me shokun e klasës, teksa thotë se ai shpëtoi falë ndërhyrjes se mësueses.
“Ai më qëlloi në shpatull dhe në këmbë. U shmanga, u futa brenda në klasë mbylla derën, por nuk e mbaja dot mbyllur për shkak të shpatullës. Në ato momenti erdhi mësuesja dhe më shpëtoi nga ai djali”.
Ai thekson se arsyeja e konfliktit ishte shoku i klasës, i cili hidhte fotot e tij dhe të familjarëve në rrjetet sociale.
“Gjithçka nisi duke më bërë foto ai mua dhe familjes time dhe shokëve të mi. Gjithashtu dhe familjes së tyre. Dhe i kishte postuar më duket në një rrjet social…”.
Ndërsa babai thotë se kërkon drejtësi, duke paralajmëruar që mos ta dërgojë të birin sërish në shkollë.
“Dua drejtësi në vend. Nuk do e çoj më në shkollë. Nuk ka më siguri”.
Në momentin kur është regjistruar konflikti, prezent kanë qenë dhe dy mësuese të shkollës.
“Kemi pyetur disa dëshmitarë okularë, dy mësuese që kanë qenë të pranishme gjatë konfliktit. Ngjarja është e rëndë, garantojmë hetim të plotë dhe të gjithanshëm”, tha prokurorja Oliana Gjergjefi.
Kjo ngjarje vjen një muaj pas vrasjes me thikë të 14-vjeçarit M.C dhe plagosjes së shokut të tij, nga një 14-vjeçar në afërsi të shkollës “Fan Noli” në kryeqytet, ku sërish motiv u bë përshkallëzimi i një konflikti të nisur në rrjetet sociale.
Tv Klan
