Kirurgu i njohur i Urologjisë, njëherësh pedagog në Mjekësi, Flamur Tartari u nda nga jeta sot në moshën 75 vjecare. Në fillim të këtij muaji, ai kishte festuar 75 vjetorin e lindjes dhe vazhdonte të ishte aktiv në prfesionin e tij. Burime të sigurta thanë se Tartari nuk është ndjerë mirë mëngjesin e sotëm dhe familjarët kanë telefonuar urgjencën e Tiranës. Ai ka mbërritur në gjendje teper të rëndë dhe ka ndërruar jetë në urgjencën e QSUT-së, aty ku punoi për 5 dekada. Mjekët thanë për Opinion.al se profesor Tartari nuk vuante nga ndonjë sëmundje, ndërsa vdekja është shkaktuar nga infarkti akut i miokardit (zemrës).
Profesor Tartari ka punuar për shumë vite si kirurg në QSUT, ku ka qenë edhe shef pavioni, ndërsa vitet e fundit i ishte bashkuar Spitalit Amerikan 2.
Mjekët të shumta kanë shprehur keqardhjen për vdekjen e papritur të Tartarit, që ndryshe e quanin “bisturia e artë”. Ndër ta është edhe drejtori i Amerikanit, Klodi Allajbeu.
Kujtimet
Pak kohë më parë në një intervistë për mediat Tartari shprehej se kishte ndërmend të shkruante një libër për vuajtjet e një kirurgu. Libër, që zemra nuk e la ta përfundojë….
“Unë kam në duar një libër, të cilin mendoj që ta titulloj “Vuajtjet edhe kënaqësitë e një kirurgu”. Për shembull, fëmijët e mi nga puna që kam bërë natë e ditë në spital nuk i kam rritur unë, por i ka rritur gruaja ime, e cila edhe duhet që të punonte edhe të rriste fëmijë. Më kujtohet një natë, ishte viti kur kishin nisur në Shqipëri punët fizike, rrëzohet një makinë e Gjergj Dimitrovit me 45 veta. Ishte ora 10 e darkës e binte shumë shi, 25 veta erdhën në spital, ka qenë 122 urgjenca.
Unë kam operuar atë natë 15 veta, kam nisur në 22.00 të mbrëmjes dhe kam mbaruar 17.00 pasdite të nesërmen. Ndërsa, për një grua tjetër të cilëne çova në maternitet, që dyshohej për barrë jashtë mitrës. Ma sollën edhe thanë që ska gjë, por e kujtoj sot pas 48 vitesh, ishte operimi i fundit që po bëja atë ditë të diele. Edhe më thanë, doktor mos bësh një gabim. Edhe e pamë e operuam dhe shpëtoi. Prandaj ne vuajmë shumë.
Nuk është puna e kënaqësisë, e para është vuatje. Ne hasim shumë njerëz me karaktere të ndryshme, prandaj mjeku duhet që të sillet njëlloj. Ne duhet që të bëjmë çështë e mundur, që njerëzit të vizitohen në spitale. Ka shumë burokraci të tepruara, prandaj shteti duhet që të vërë dorë menjëherë”, do të shprehet doktor Flamur Tartari.
/Opinion.al
