Për herë të parë pas një shekulli, qëkur prej aty u largua perandori i fundit Pu Yi, Kina ka hapur dyert e Qytetit të Ndaluar për publikun gjatë natës. Të martën dhe të mërkurën, me rastin e festës së dritave, kompleksi i cili shërbeu si rezidencë për perandorët kinezë për më shumë se pesë shekuj, priti një grup vizitorësh të cilët panë spektaklin e dritave në një atmosferë unike në mbrëmje.
Qyteti i Ndaluar shërbeu për rreth 500 vjet si pallati i perandorëve të dinastisë Ming dhe Qing. Ai ndodhet në qendër të Pekinit dhe gjithashtu ka shërbyer si pallat ceremonial për qeverinë kineze. I ndërtuar mes viteve 1406 dhe 1420, kompleksi përbëhet nga 980 ndërtesa dhe 8797 dhoma, në një sipërfaqe prej 72 hektarësh. Zyrtarisht quhet kompleksi më i madh në botë.
Biletat për këtë event ishin të pakta, ndërsa kërkesa ishte shumë e madhe duke bërë që të paguhej mbi 500 euro një vend. Në fakt, ky kompleks shërben si muze dhe është ndër më të vizituarit në botë, por kurrë nuk ka qenë i hapur pas perëndimit të diellit. Historikisht është mbyllur në orën 16:00 gjatë dimrit dhe në orën 17:00 gjatë verës. Në bazë të këtij vendimi qëndrojnë arsyet e sigurisë, pasi është i vështirë monitorimi i 72 hektarëve sipërfaqe edhe gjatë natës.
Përveç spektaklit të dritave, të martën dhe të mërkurën brenda pallatit dha shfaqje edhe opera e Pekinit, ndërsa aktorët mbanin maska të figurave mitologjike kineze. Drejtori i këtij muzeu, Shan Jixiang, tha se duke parë suksesin e këtij eksperimenti, ndoshta mund të përsëritet edhe në të ardhmen./Opinion.al
