Kur e gjithë bota është mbledhur në Samitin e Klimës në Paris për të luftuar ndotjen, në kryeqytetin Pekin të Kinës për të pestën ditë me radhë është e tepërt të flasësh për oksigjen. Shkollat në Pekin kanë pezulluar të gjitha aktivitetet në natyrë për nxënësit, ndërkohë që ndotja ka kapur nivele rekord. Kryeqyteti është përfshirë nga një smog që pakëson shikueshmërinë në 10 metra. Niveli i grimcave ndotëse PM 2,5 ka superuar 24 herë nivelin e lejueshëm nga OMS. Pikërisht në kohën kur Presidenti Xi Jinping gjendet në Paris për Konferencë e Kombeve të Bashkuara mbi ndryshimet klimatike.
