Presidenti kinez, Xi Jinping deklaroi se Kina nuk do të lejojë kurrë që forcat e huaja të ndërhyjnë në rajonet e saj të Hong Kongut dhe Makaut.
Duke folur në një ceremoni për shënimin e 20-vjetorit të kthimit të rajonit Makau nën rregullat kineze, ai ka përshëndetur ish-koloninë portugeze për patriotizmin dhe besnikërinë që ka, mirëpo nuk ka përmendur në asnjë moment protestat kundër qeverisë në ish-koloninë britanike, të Hong Kongut.
“Më duhet ta theksoj se prej kthimit të Hong Kongut dhe rajonit Makau në vendin amë, çështjet e këtyre rajoneve të veçanta administrative janë punë të Kinës dhe të asnjë force tjetër të huaj. Nuk do të lejojmë kurrë që forcat e jashtme të ndërhyjnë”, ka shtuar ai.
Rajoni Makau i është kthyer Kinës më 20 dhjetor të vitit 1999, sipas organizimit të njëjtë me të cilin funksionon edhe Hong Kongu, “një shtet, dy sisteme”.
Pikërisht për këtë çështje në Hong Kong është duke protestuar prej muajsh të tërë, pasi banorët e këtij vendi thonë se po u cënohen të drejtat e tyre.
Pekini në anën tjetër mohon të ketë cenuar autonomonë e Hong Kongut dhe ka fajësuar vazhdimisht qeveritë e huaja, duke përfshirë Shtetet e Bashkuara dhe Britaninë për nxitje të trazirave./Opinion.al
